— Сястра Крыспіна, другі год запар вы становіцеся лаўрэатамі гэтага конкурсу: першае месца — летась, сёлета — другое. Пэўна ж, радуе гэта ўсё вас?
— Безумоўна. Мінулы год, выбіраючыся ў Віцебск, мы і не марылі пра такі поспех. Думалі: ну дзе там мы, вясковыя, згонімся з гараджанамі! Таму можаце ўявіць нашу радасць, калі нас аб’явілі пераможцамі. Мала таго, што дыплом атрымалі, дык вунь колькі не абы-якіх падарункаў дадому прывезлі.
— А як успрынялі вашу перамогу ў вёсцы?
— Для ўсіх вяскоўцаў гэта была вялікая радасць. Для людзей, якія шмат працуюць і не заўсёды маюць магчымасць заявіць пра сябе, важна, каб пра іх таксама ведалі. Можна сказаць, што гэта быў для жыхароў Параф’янава момант духоўнага ўзвышэння.
— І для дзяцей, напэўна, таксама?
— Так, безумоўна. Але для іх гэта яшчэ быў і стымул. Дзеткі паверылі ў сябе, у свае сілы, і гэта надало нам усім імпэту працягваць справу. Пасля таго конкурсу наш калектыў займеў папулярнасць, мы выступілі, апроч роднага Параф’янава, у Сітцах, Докшыцах, Маладзечне. Падрыхтавалі містэрыю да 100-годдзя касцёла.
— Колькі дзяцей займаецца ў гуртку?
— Пад сорак. Так шмат жадаючых, што часам і выбраць на нейкую ролю каго-небудзь цяжка. Маем уласных «зорак». Напрыклад, вельмі добрымі акторскімі дадзенымі валодаюць Аксана Ючковіч і Алёна Івашчонак, Оля Адамовіч піша цікавыя сцэнары. Нашы дзеці вельмі ахвотна займаюцца творчасцю.
— У мінулым годзе мяне асабіста вельмі ўразілі ў выступленні вашага калектыву дзве рэчы: густоўнасць тэксту і рэжысура. Вы самі, часам, не маеце тэатральна-мастацкай адукацыі?
— Не. Але калісьці я падумвала пра тое, каб звязаць свой лёс з тэатрам. Выконвала сякія-такія ролі. Апошні раз выходзіла на сцэну ўжо законнаю сястрою. Наогул, тэатр заўсёды любіла і люблю. Таму, напэўна, і ўзялася за гэтую справу ў Параф’янаве.
— Як ставяцца да захаплення пастаноўкамі парафіяльных дзяцей іх бацькі?
— Вельмі станоўча. Дапамагаюць, калі гэта трэба, выдаткоўваюць грошы на касцюмы. Для іх жа гэта таксама — стымул і справа гонару.
— У сёлетнім вашым спектаклі шмат пантамімы, спеваў. Трымаеце сувязь з мясцовай музычнай школай?
— Трымалі б, калі б яна была. А так даводзіцца да ўсяго даходзіць самім. Гэта складана, але разам з тым і цікава.
— Як вам бачыцца месца такога калектыву, як ваш, у выхаванні дзяцей і дарослых?
— Для дзяцей сам факт супольнае працы вельмі важны, бо праца такая і выхоўвае пачуццё калектывізму, і дазваляе кожнаму выявіць свае здольнасці, і пашырае кругагляд. Для дарослых, апроч візуальнай асалоды ад добра сыгранай іх дзіцём ролі, гэта яшчэ і магчымасць акунуцца ў свет мастацтва, нагода падумаць пра будучыню сваіх таленавітых дзетак...
— ... якія паедуць у горад вучыцца і забудуцца на тое, чым жылі зусім нядаўна?
— Нашы — не забываюцца. Заўжды прыходзяць на святую Імшу ў касцёл ды і так зазіраюць пры нагодзе.
— Сястра Крыспіна, у мяне такое ўражанне, што вы вельмі любіце сваіх парафіянаў.
— Гэта праўда. Нашы вернікі вельмі шчырыя, адкрытыя да дыялогу, таму іх нельга не любіць. Але я не проста іх люблю — я шчаслівая, што маю магчымасць працаваць і жыць сярод іх. Жыць побач з людзьмі, якія хочуць, прагнуць Пана Бога — гэта для мяне, як і для кожнай сястры, кожнага святара, — вялікае шчасце.
— Дзякую за гутарку. Поспехаў вам і ўсім жыхарам Параф’янава!