* * * Дыхаю Тваім небам. Тварам у твар з Табою, Я адчуваю: не трэба Руйнаваць Твайго супакою. Няхай silentium sacrum; Вежы — ходнікі ў вечнасць; Узнёсласць і светлыя мары Хістаюць мае межы. Усё, што было трывалым, Раптам ў няіснасць зыходзіць — Мы пры Тваёй браме — Каменьчыкі на дарозе...

 

* * * Сонца ўзыходзіць, спіць мястэчка, Роўна дыхае, бачыць сны, Лье супакой і гукае вечнасць Будслаў несвяточны, але святы. Б’ецца сэрцам маёй Беларусі, Спевам птушыным недзе ў раллі, Крыжам лунае, як белы бусел, Будслаў несвяточны, але святы. Маці з пяшчотай дзіця люляе, Каб адхіліць, аддаліць ад бяды. Позірк яе назаўжды ўтрымае Будслаў несвяточны, але святы. Калі, маладая альбо старая, Стамлюся ад тлуму ды барацьбы, У хвілі апошняй сваёй узгадаю Будслаў несвяточны, але святы.

 

* * * У ноч па дарозе — світанне пачнецца няхутка. Пытаецца хтосьці, ці будзе калісь яно? Пранізлівы вецер халоднай імжой ахутаў Зганьбаваную веру, забітую гвалтам любоў... У цемры пакутнай міжволі збіваюцца крокі I голаў паволі схіляе долу туга Па некім здабытай і страчанай намі волі, Вольнай і цвёрдай, як Бог запаведаў нам. У маўклівых нябёсах звоняць званы жалобу Па кожнаму з нас, бо не ўмеем трывалымі быць. Бо веру, і мову, і праўду свае аддалі на згубу, Вучыліся больш ненавідзець, а не любіць... Магутны Божа, які над сусветам уладарыш, Трываеш у вечнасці й глыбі сэрцаў малых, Стварэнням сваім, каб у пакутнай імжы не блукалі, Агеньчык надзеі, як свечку ўначы, запалі! Прымі ў сваю ласку такіх, няўдзячных і слабых, Няшчырых, нядбалых у смутку абранай душы, Застыла адданых сабе і толькі ў сябе закаханых, Паверыць Табе, не шукаючы ран, навучы...

 

* * * Чыстая ўзнёсласць лёгкіх святых скляпенняў Задыхае раптам, быццам абуджана з мараў, Вусны ўзнясуць урачыстыя словы малення: Regina caeli, letare! Смутку няма ў абліччы Асветленай Панны, Травеньскі вэрхал змяняе Твой супакой, Бо quia quem meruisti portare Ужо не пакіне апекі сваёй над зямлёй. Смерці няма, пераможанай Боскай ахвярай — Хто мае вушы, няхай гэты вокліч пачуе. Хай пойдзе у свет і няспынна яму абвяшчае: Resurrexit, sicut dixit! Alleluja! 3 сонечных светлых муроў каталіцкай святыні, Якія ўзняліся пад сінім крывіцкім небам, Марыя з Будслаўя, Маці Белай Краіны, Ora pro nobis Deum! Юлія Шэдзько