Запомніце і прымяняйце!
+ Падчас візіту да ўрача інфармуйце яго пра ўсе лекі, якія ўжываеце. Нават калі прымаеце вітаміны, трэба, каб урач ведаў пра гэта. Вітаміны Е, С, фоліевую кіслату, а таксама прэпараты з жалезам, цынкам і магніем нельга спалучаць з некаторымі антыбіётыкамі (асабліва з тэтрацыклінавымі), бо лячэнне не прынясе ніякага эфекту.
+ Лекі запівайце толькі вадою, а не гарбатай, кавай, малаком, сокамі ці кока-колай. Некаторыя лекі трэба прымаць падчас ежы (уважліва чытайце рэкамендацыі на інфармацыйным лістку, які павінен быць пры кожным леку, купленым у аптэцы), але большасць лекаў трэба прымаць перад ежай. Лепш за ўсё прымаць лекі за 2 гадзіны да пасілку, а таксама не раней, чым праз 2 гадзіны пасля ежы (калі ўрачом ці вытворцам леку не рэкамендавана інакш). Трэба пазбягаць узаемадзеяння з грэйпфрутам (свежым фруктам і сокам з яго), бо, калі вы з’елі грэйпфрут ці выпілі сок з яго, лекі можна піць толькі праз 4 гадзіны!
+ Не прымайце адначасова тых лекаў, якія маюць супрацьлеглае дзеянне. Такім чынам, нельга падчас таго ж самага лячэння прымаць:
+ адхарквальных лекаў ці тых, якія раствараюць макроту (аmbroxol, acetylocystein, сarbocisteine), з лекамі, якія затрымліваць кашаль (што маюць у сваім складзе, напрыклад, кадэін);
+ лекаў, якія раствараюць макроту (ambroxol, acetylocystein, carbocisteine), з так званымі супрацьгістамінавымі (clemastine, рromethazine) лекамі, а таксама з прэпаратамі кальцыю;
+ лекаў ад паносу і тых, ад якіх узнікаюць запоры.
Вучоныя-медыкі перасцерагаюць: адначасовае ўжыванне нават толькі двух лекаў павялічвае рызыку з’яўлення паміж імі інтэракцыі(узаемадзеяння) на 13%, трох лекаў — гэты працэнт павялічваецца да 34, а пры пяці — складае ажно 88%.
Якія прадукты харчавання не пажадана або нават небяспечна ўжываць разам з лекамі
Прадукт харчавання | Шкоднае ўздзеянне пры спалучэнні з лекам | Наступствы спалучэння |
---|---|---|
Аўсяныя шматкі, аўсянае вотруб’е, жытні хлеб | Зніжаюць засвойванне: а) вытворных наперстаўкі (лекавая расліна digitalis) — digoxin, bemecor, якія прымяняюцца пры парушэннях рытму сэрца, б) антыдэпрэсантаў (imipraminum, amitriptyline) |
а) абвастрэнне недастатковасці кровазвароту, узнікненне затораў у сасудах (эмбалія) б) зніжэнне дзеяння лекаў супраць дэпрэсіі і супраць фобіі |
Кукурузны крухмал, какосавы алей | Змяншаюць напалову засвойванне фенітаіна (phenytoin), што прымяняецца пры лячэнні эпілепсіі | Адсутнасць эфектаў лячэння |
Смажанае мяса і мяса-грыль | Змяншае канцэнтрацыю прэпаратаў тэафіліна (theophylline), якія прымяняюцца ў лячэнні астмы | Удушша, зніжэнне ціску, галаўны боль, парушэнне сну |
Смажаныя яйкі, тлушч, тлустае малако | Узмацняюць дзеянне лекаў: а) супрацьгрыбковых (грызеафульвіны) і супрацьпаразітных; б)бэта-адрэналітыкаў (atenolol, propranolol); в) антыдэпрэсіўных (amitryptylin, imipramin) |
а) галаўны боль і галавакружэнне, кашаль, змены на скуры; б) зніжэнне ціску, запавольванне рытму сэрца; в) парушэнне свядомасці, парушэнне сну, зніжэнне ціску |
Сыры (тыпу галандскі, расійскі), спелыя бананы, авакада, паштэты (прыгатаваныя некалькі дзён назад) | Узмацняюць дзеянне антыдэпрэсіўных лекаў і лекаў супраць туберкулёза (іsoniazid) | Павышэнне ціску, арытмія сэрца, галаўны боль |
Малако, тварог, ёгурты | Напалову змяншаюць дзеянне тэтрацыкліна і фторхіналонаў (антыбіётыкаў, якія прымяняюць у лячэнні інфекцый мачавых і дыхальных шляхоў) | Адсутнасць эфекту лячэння |
Апельсінавы сок | Змяншае дзеянне эрытраміцына і бензілпеніцыліна (антыбіётыкаў) | Адсутнасць эфекту лячэння |
Грэйпфрутавы сок | Узмацняе дзеянне блакатараў кальцыевага канала (adalat), цыкласпарына (sandimmun) і супрацьалергічных лекаў | Арытмія сэрца, зніжэнне ціску, боль галавы, сутаргі (канвульсіі) |
Кава, гарбата | а) змяншае засвойванне прэпаратаў жалеза, якія прымяняюцца ў лячэнні анеміі (hemofer, ascofer); б) узмацняюць дзеянне супрацьастматычных лекаў (aminophyllinum) |
а) адсутнасць эфекту лячэння; б) узбуджальнасць, неспакой, арытмія сэрца |
Паводле матэрыялаў польскіх медыцынскіх дапаможнікаў і часопісаў.