Пад апекаю Маці Божай Анёльскай
Гледзячы на новакансэкраваную ім святыню, Яго Эмінэнцыя кардынал Казімір Свёнтэк сказаў: «Найвышэйшае шчасце для мяне, калі Езус займае ў святыні належнае Яму месца – пасяляецца ў табернакулюме. Тады святыня ажывае, набывае сваю душу. І з гэтага моманту яе асабліва трэба аберагаць і абараняць, каб яна заўсёды была сапраўдным Домам Божым...»
Каб былі праўдзівым адлюстраваннем Хрыста...
Касцёл св. Зыгмунта ў новым мікрараёне Баранавічаў – адзіная на Беларусі святыня, якой Апостальскай Сталіцай нададзены статус юбілейнай як знак Юбілейнага 2000 Года хрысціянства.
Ва ўрачыстасць Найсвяцейшай Тройцы, якраз у гадавіну кансэкрацыі касцёла, кардынал Казімір Свёнтэк удзяліў сакрамант бежмавання вернікам трох парафій горада. Арцыпастыр пажадаў бежмаваным, каб «сталі больш дасканалым падабенствам Хрыста і сапраўднымі членамі Яго Касцёла, а перад светам сведчылі пра муку і змёртвыхпаўстанне Хрыста, каб, як сказаў апостал, заўсёды вашае жыццё было праўдзівым адлюстраваннем Хрыста». На ўрачыстай Святой Імшы прысутнічала каля тысячы вернікаў. Завяршаючы ўрачыстасць, Яго Эмінэнцыя сказаў:
«... Якімі б справамі я не быў бы заняты, але адмовіць гораду Баранавічы, калі святары запрашаюць мяне, я не маю сілы. Тут прайшло маё дзяцінства, юнацтва, вучоба. І таму з задавальненнем сёння я прысутнічаю ў горадзе майго дзяцінства і маладосці і шчыра радуюся, што бежмавана больш як 200 вернікаў, і амаль усе прысутныя прынялі Святую Камунію... Некалькі дзён назад можна было пачуць, што Баранавічы – гэта праваслаўны горад. Я не аспрэчваю гэтага выказвання. Але сёння я маю ўсе падставы сказаць: Баранавічы – гэта таксама горад каталіцкі. Пацвярджэннем з’яўляецца колькасць вернікаў, якія ўдзельнічаюць не тэарэтычна, але практычна ў абрадах і ў жыцці каталіцкага Касцёла...
Так склалася, што нядаўна я вярнуўся з Рыма, дзе сустракаўся са Святым Айцом. Сэрца яго адкрыта не толькі для ўсіх вернікаў Беларусі, але і для ўсіх хрысціянаў, і асабліва для братоў і сясцёр нашых праваслаўных. Прыклад гэтаму – візіт у Балгарыю, якая з’яўляецца ў большасці праваслаўнай краінай. Але, нягледзячы на гэта, Ян Павел ІІ быў запрошаны ў гэтую краіну і сустрэўся з патрыярхам Максімам – галавой праваслаўнай балгарскай Царквы. Гэта сведчанне таго, што наш Святы Айцец мае асаблівы дар Духа Святога паядноўваць людзей, а не раздзяляць іх, паядноўваць, нягледзячы на нацыянальнасць, веравызнанне ці на нейкія іншыя асаблівасці... Вы можаце быць упэўнены, што ён заўсёды з намі. Гэта не таямніца, што пры кожным нашым спатканні Святы Айцец кажа: «Мне так хочацца прыехаць на Беларусь. Я жыву гэтым». Няхай жа яго жаданне споўніцца...»
Фота М. Новікава.