Дарагія браты і сёстры, што пакутуеце ад цярпенняў душы і цела, я жадаю ўсім вам, каб вы маглі зразумець і прыняць заклік Бога, які наказвае вам быць творцамі міру праз ахвяру вашага цярпення. Няпроста адказаць на такое цяжкае пакліканне. Заўсёды з надзеяй углядайцеся ў Езуса, «церпячага Слугу», просячы ў Яго сілы, якая дасць вам магчымасць перамяніць у дар цярпенне, што вас непакоіць. З вераю слухайцеся Яго голасу, які скіраваны да кожнага чалавека: «Прыйдзіце да Мяне, усе спрацаваныя і абцяжараныя, і Я супакою вас» (Мц 11, 28).

Панна Марыя, Маці Балесная і Каралева Супакою, няхай выпрасіць для ўсіх вернікаў дар нязломнай веры, якая так моцна патрэбная свету, бо дзякуючы ёй сілы зла, нянавісці і нязгоды будуць абяззброеныя праз ахвяру слабых і хворых, з’яднаную з Пасхальнаю таямніцаю Хрыста Адкупіцеля.

Варта падкрэсліць, што хвароба ніколі не з’яўляецца толькі фізічным злом. Гэта адначасова маральнае і духоўнае выпрабаванне. Каб выйсці з яго пераможцам, хвораму патрэбна вельмі шмат унутранай сілы. Праз сакрамэнт намашчэння Хрыстус дае яму адчуць сваю любоў і адорвае яго духоўнымі сіламі.