№1(59) 2012

Гэты нумар часопіса распачынаецца Пасланнем Святога Айца Бэнэдыкта XVI на ХLV Сусветны дзень міру 1 студзеня 2012 года.

Працягваюцца: публікацыя ўрыўкаў з кнігі «Бэнэдыкт XVI. Святло свету: Папа, Касцёл і знакі часу. Размова з Петэрам Зэевальдам» у перакладзе з нямецкай мовы Ірыны Бурак; пераклад Алеся Жлуткі працы Стэфана Свяжаўскага «Святы Тамаш, прачытаны нанава», а таксама пераклад працы Тамаша Кэмпійскага «Сьледам за Хрыстом», зроблены Станіславам Грынкевічам.

Айцец Пётр Рудкоўскі ў эсэ «Выходзьма са сваіх магілаў!» заклікае беларусаў да нацыянальнага самаўсведамлення ў кантэксце Крыжовага шляху Хрыста.

У публікацыі Валерыя Буйвала «З’яўленне Хрыста народу» распавядаецца пра шэдэўр вялікага рускага жывапісца Аляксандра Іванава.

Пісьменніца Ірына Жарнасек у інтэрв’ю «Што ў падмурку?» гаворыць з ксяндзом Юрыем Барком пра асновы хрысціянскай веры.

120-годдзю з дня нараджэння ксяндза Адама Станкевіча прысвечаны артыкул даследчыцы Ірыны Багдановіч.

Беларускі гісторык Юрась Гарбінскі прапануе чытачам публікацыю лістоў ксяндза Андрэя Цікоты са сталінскіх лагераў — «Шлю прывітанне з далёкай Сібіры…».

«Заняпад глабальнай вёскі» — так называецца артыкул Яраслава Макоўскага, аўтар якога разважае пра горкі вобраз сучаснага свету.

Вядомы беларускі даследчык Уладзімір Содаль у матэрыяле «Сямейныя рэліквіі Францішка Багушэвіча» апавядае пра рэчы, якія належалі сям’і паэта.

Кандыдат філалагічных навук, прафесар Ева Лявонава ў артыкуле «Сюжэт біблейскай прыпавесці…» разважае пра аповесць Васіля Быкава «Сотнікаў» у святле старазапаветнай прытчы пра Каіна і Абэля.

Пра новую кнігу вершаў Рыгора Барадуліна «Anima» піша Міхась Скобла ў літаратуразнаўчым эсэ «Збудаваць свой каўчэг».

У рубрыцы «Паэзія» друкуюцца вершы Алеся Гібка-Гібкоўскага.

Майстра беларускай мастацкай прозы Генрых Далідовіч прапануе чытачам урывак са свайго рамана «Рурыкавічы і Рагвалодавічы».

Пісьменніца Данута Бічэль у артыкуле «Іван Лагвіновіч — паэт з палескага хутара Запрапасць» піша пра свае думкі падчас перачытвання пасмяротнай кнігі вершаў І. Лагвіновіча «Элегія палескага матыля».

Вядомы беларускі рэстаўратар Аркадзь Шпунт у эсэ «Роздум на лузе» прыгожа разважае пра кветкі і травы як частку Божага стварэння.