Нядаўна пабачыў свет новы альбом «Беларусь».

Ён складаецца з пяці тэматычных раздзелаў, якія эфэктна прэзэнтуюць нашу краіну. Фотаінфармацыя пра самыя значныя падзеі краіны змешчана ў раздзеле «Гісторыя». Саломапляценне, ткацтва, абразы, іншыя творы і вырабы народных майстроў адлюстраваны ў раздзеле «Народнае мастацтва». Перліны архітэктуры — Мірскі замак, касцёл Найсвяцейшага Божага Цела ў Нясвіжы, Белая вежа і гісторыя беларускага дойлідства — у «Архітэктуры». Непаўторныя краявіды, возера Нарач і рака Прыпяць, свет птушак і жывёл адлюстраваны ў «Прыродзе». Гісторыя і сённяшняе жыццё сталіцы — Мінска — у аднайменным раздзеле.

Старонкі выдання ўпрыгожваюць 80 фотаздымкаў лепшых беларускіх фатографаў — Паўла Бараноўскага, Яўгена Казюлі, Анатоля Клешчука ды іншых. Агульная канцэпцыя і падбор ілюстрацый у спалучэнні з выключнай якасцю паліграфіі робяць гэтую кнігу аднім з першых еўрапейскіх выданняў такога кірунку на Беларусі.

Падрыхтаваў і выдаў новы альбом Дзяніс Раманюк, вядомы па падрыхтоўцы манаграфіі Міхася Раманюка «Беларускія народныя крыжы», якая атрымала тры вышэйшыя ўзнагароды на Рэспубліканскім конкурсе «Мастацтва кнігі».

Дзяніс Раманюк маляўніча і густоўна паказаў сваю краіну вачам беларусаў, але галоўная мэта стварэння кнігі — прэзентацыя Беларусі яе гасцям.

Два варыянты альбома на беларуска-нямецкай і ангельска-расейскай мовах робяць максімальна даступнай інфармацыю для чытачоў розных моўных груп.

Па пытаннях звяртайцеся: ramaniuk@hotmail.com.