«КАБ ЗРАБІЛАСЯ СВЕТЛА…»

Чысты чацвер яшчэ не Вялікдзень але ўсё далей і далей гучыць сірэна «хуткай дапамогі» як быццам да свята ўсё супакойваецца

* * * Старамодна на сваім дыване-самалёце сядзіць Бог усміхаецца і кідае мне канат вокам не міргнуў папляваў я на далоні спружыніста разбягаюся каб скокнуць тут падцягнуцца проста дробязь а я ўжо спужаўся да смерці што магу зрабіцца пасмешышчам

* * * Ні крыку лаянкі ні грукату падае свежы снег асцярожна ўкладаюць каціныя лапы ружанец вакол дома

* * * У штодзённых клопатах пакінуць адну руку вольнаю і дацягнуцца да зорак

* * * Твар быў пусты заззяў калі ўбачыў травінку якая паднімала ўгору асфальт

* * * На небе ўсё робіцца ўпарадкавана ўсход і захад сонца арбіты спадарожнікаў набліжаецца знічка пстрыкае пальчыкам паказвае нос Галілей не даскоквае плюхаецца ў ручай і не чуе рогат Млечнага Шляху

* * * Грузападымальныя краны закрываюць кратамі неба недасягальна за агароджаю будпляцоўкі стаіць більдшток1 адзін-адзінюткі.

* * * Сёння сцяг не прыспушчаны колеры перакульваюцца жыццярадаснасць б’е цераз край а там там яшчэ схаваны блакіт матылька які надае мужнасці зрэнцы вока — прарочыць фіялетавы колер ранаў

* * * Сагнутая ад ранаў твая спіна кволыя твае птушыныя костачкі і вузялковае пісьмо ў цябе на грудзях апавядае як гэта кожны дзень жыць нанава

* * * Каб зрабілася светла я прашу аб святле адна дзве жменька і больш агнёвых саламандраў ззяюць сваёй жаўцізною

Пераклад з нямецкай мовы
Алены Сямёнавай-Герцаг.

1. Драўляная ці мураваная калона з выяваю распяцця, Дзевы Марыі ці іншых святых, якую ўстанаўліваюць у каталіцкіх мясцовасцях каля дарогі, часам на будынку, дзеля чытання побач з ёю кароткай малітвы ці памінання нябожчыкаў, таму яе называюць таксама «малельнаю калонаю» (Betsäule). Некаторыя месцы ў Паўднёвай Германіі называюць «зямлёю Пана Бога» (Herrgottsland) ці Дзевы Марыі (Madonnenländle) з-за вялікай колькасці такіх калонаў.