З СЯРЭБРАНЫМ ЮБІЛЕЕМ!

Сёлета навукова-папулярны рэлігійна-культуралагічны часопіс «Наша вера» адзначае 25-годдзе свайго існавання. Ён асвятляе складаныя праблемы духоўнасці, гісторыю хрысціянства і каталіцызму ў Беларусі і ў свеце, а таксама сучаснае рэлігійнае і духоўнае жыццё, навіны беларускай і замежнай хрысціянскай літаратуры; знаёміць з духоўнай спадчынай вялікіх містыкаў Касцёла, працамі навукоўцаў, мастацтвазнаўцаў, філолагаў, гісторыкаў, архітэктараў і рэстаўратараў.

Пачатак выдання часопіса «Наша вера» супаў з першымі крокамі духоўна-асветніцкага адраджэння пасля працяглага атэістычнага перыяду ў жыцці нашай Айчыны. Часопіс стаў значным асяродкам для евангелізацыі, экуменічнай місіі і адраджэння беларускай хрысціянскай культуры і літаратуры, зрабіўшы свой значны ўнёсак у захаванне і развіццё нашай роднай мовы, асабліва сакральнай і тэалагічнай лексікі.

Святы Ян Павел ІІ падкрэсліваў, што хрысціянскія сродкі масавай камунікацыі «перадусім маюць абавязак і прывілей абвяшчаць праўду — хвалебную праўду пра чалавечае жыццё і яго прызначэнне, праўду, аб’яўленую ва Уцелаўлёным Слове. Толькі б католікі, якія працуюць у сродках масавай камунікацыі, змаглі абвяшчаць Езуса „на дахах“ з усё большай адвагаю і радасцю, так, каб усе людзі пачулі пра любоў, якая з’яўляецца сэрцам „самакамунікацыі“ Бога ў Езусе Хрысце — адначасова ўчора, сёння і навекі (гл. Гбр 13, 8; Ян Павел ІІ, 35-ы Сусветны дзень сродкаў масавай камунікацыі, 24.01.2001 г.). Абвяшчэнне Езуса — дарогі, праўды і жыцця — няхай стане натхненнем і пасланніцтвам для ўсіх, хто заангажаваны ў няпростую справу выдання часопіса.

Віншуючы з сярэбраным юбілеем супрацоўнікаў рэдакцыі, паважаных аўтараў часопіса, шматлікіх чытачоў і карыстальнікаў інтэрнэт-версіі часопіса, спадзяюся, што і надалей часопіс «Наша вера», служачы Богу і Касцёлу, будзе плённа працягваць і развіваць сваю шматгранную місію: яднаць хрысціянаў і ўсіх людзей добрай волі.

Няхай Дух Святы вас асвячае і заўсёды вам спадарожнічае! Давяраючы Богу рэдакцыю часопіса, яго аўтараў і чытачоў, жадаю, каб вы былі сапраўднымі вестунамі і сведкамі Евангелля і ад усяго сэрца благаслаўляю.

Арцыбіскуп Тадэвуш Кандрусевіч
Мітрапаліт Мінска-Магілёўскі
Старшыня Канферэнцыі Каталіцкіх Біскупаў у Беларусі

Снежань, 2020 г.