СЛОВЫ ВІНШАВАННЯ ЧАСОПІСУ АД АРЦЫБІСКУПА ЮЗАФА СТАНЕЎСКАГА

Шаноўныя супрацоўнікі рэдакцыі часопіса «Наша вера», шаноўныя аўтары і чытачы, ёсць выдатная нагода звярнуцца да вас усіх з самымі сардэчнымі словамі віншавання — соты, юбілейны нумар квартальніка. Бог дае нам такія знакавыя юбілеі, як своеасаблівыя вехі на пройдзеным шляху, каб мы маглі асэнсаваць гэты шлях, падвесці вынікі і з Божаю дапамогаю рушыць далей.

Квартальнік «Наша вера» пачаў выходзіць у свет з благаслаўлення легендарнай асобы кардынала Казіміра Свёнтка, які на самым пачатку выказваў спадзяванні, што «часопіс дапаможа духоўнаму выхаванню нашага грамадства, што стане карысным і неабходным шырокаму колу беларускіх чытачоў». І вось сёння, трымаючы ў руках соты нумар часопіса, мы можам з радасцю канстатаваць, што надзеі кардынала Казіміра Свёнтка спраўдзіліся, што на працягу ўсіх гэтых амаль трох дзясяткаў гадоў часопіс «Наша вера» з’яўляецца сапраўднаю школаю евангелізацыі нашага грамадства, адкрываючы новыя невядомыя старонкі гісторыі Каталіцкага Касцёла, знаёмячы чытачоў з яго выдатнымі асобамі, з лепшымі ўзорамі хрысціянскай літаратуры, нашай каталіцкай духоўнай спадчыны — мастацтва, музыкі, архітэктуры…

Зычу ўсім супрацоўнікам рэдакцыі часопіса і ўсім аўтарам новых творчых адкрыццяў і дасягненняў; зычу шчодрай Божай ласкі і нястомнай апекі Марыі на далейшую плённую працу дзеля дабра Касцёла і духоўнага ўзрастання нашага грамадства.

Арцыбіскуп Юзаф Станеўскі,
Мітрапаліт Мінска-Магілёўскі.