№ 4 (34) 2005

Чарговы нумар часопіса «Наша вера» пачынаецца рубрыкай «Галерэя», у якой друкуецца артыкул мастацтвазнаўцы Валерыя Буйвала «Эль Грэко. Пахаванне графа Оргаса», дзе апавядаецца пра адзін з шэдэўраў сусветнага мастацтва — таленавіты твор вялікага іспанскага жывапісца, які захоўваецца ў касцёле Санто Томэ (Таледа) (>>).

У рубрыцы «На кніжнай паліцы» чытачам прапануецца працяг кнігі Яна Паўла ІІ «Устаньце, хадзем!», а таксама працяг яго кнігі «Памяць і самасвядомасць» у перакладзе з польскай мовы Крыстыны Лялько (>>|>>).

Мастацтвазнаўца Вольга Бажэнава ў артыкуле «Алтары і арганы мінскай архікатэдры» апавядае пра сучаснае аднаўленне мінскага архікатэдральнага касцёла Імя Найсвяцейшай Панны Марыі (>>).

У рубрыцы «Падзеі» змешчаны матэрыялы, прысвечаныя ІІ Міжнароднаму кангрэсу Апосталаў Божай Міласэрнасці і Апостальскаму руху Божай Міласэрнасці, а таксама гісторыі яго ўзнікнення і развіцця (>>|>>).

«Аднавіць усё ў Хрысце!» — так называецца матэрыял Пятра Асцюка, у якім аўтар разважае пра значэнне і ролю Другога Ватыканскага Сабору ў жыцці Каталіцкага Касцёла (>>).

У рубрыцы «Кантрапункт» змешчаны матэрыял кс. Аляксандра Амяльчэні «Ці патрэбна Богу рэклама?», у якім разглядаюцца магчымасці Касцёла ў выкарыстанні сродкаў масавай інфармацыі для больш шырокага і актыўнага кантакту з мільёнамі людзей (>>).

Пятрусь Рудкоўскі ОР у рубрыцы «Хрысціянская думка» прапануе чытачам свой дыялог-адказ вядомаму беларускаму філосафу Валянціну Акудовічу пасля прачытання яго кнігі «Мяне няма. Роздумы на руінах чалавека» (>>).

«Каб плыць па чыстай вадзе...» — так называецца артыкул журналісткі Галіны Калевіч, у якім апавядаецца пра творчасць таленавітага беларускага мастака, геолага Данііла Тварановіча-Сеўрука, які ў сваім штодзённым жыцці і творчасці спавядае высокія прынцыпы хрысціянскай маралі (>>).

Памяці Адама Міцкевіча з нагоды 150-годдзя з дня яго смерці прысвечана публікацыя літаратуразнаўцы Ірыны Багдановіч «Рыцар слова і духу» (>>|>>).

У рубрыцы «Паэзія» змешчаны вершы Алеся Пісьмянкова і Галіны Тварановіч (>>|>>).

100-годдзю з дня нараджэння выдатнага майстра беларускай прозы Яна Скрыгана прысвечана публікацыя «Круг вечнасці» балгарскай даследчыцы, кандыдата філалагічных навук Розы Станкевіч (>>|>>).

У рубрыцы «У выдавецтве „Pro Christo“» літаратуразнаўца Ала Сямёнава прапануе чытачам свае развагі пра новую кнігу Ніла Гілевіча «На флейце самоты» (Мн., 2004) (>>).

У рубрыцы «Проза» змешчана апавяданне пісьменніка Алеся Чобата «Крыж над Нёманам», у якім аўтар таленавіта паказвае драматычныя моманты ў жыцці Тамаша Зана (>>).

«Новыя словы пра Стары Запавет» — так называецца артыкул доктара філалагічных навук Галіны Тычкі, у якім аўтарка аналізуе кнігу Галіны Сінілы «Біблія як феномен культуры і літаратуры» (Мн., 2004) (>>).

Паэзіі Вінцука Адважнага, вядомага беларускага пісьменніка і святара, прысвечаны артыкул Міколы Мікуліча «Агнём нябесным я ахрышчан...» (>>).

У рубрыцы «Постаці» змешчаны матэрыял беларускай пісьменніцы Дануты Бічэль пра адну з найцікавейшых асобаў беларускай культуры 1920-х гадоў, сучасніцу Максіма Багдановіча — пісьменніцу Зоську Верас (Людвіку Сівіцкую) (>>).

Доктар архітэктуры Тамара Габрусь у рубрыцы «Нашы святыні» прапануе чытачам працяг артыкула «Сакральная памяць Астравеччыны», у якім распавядае пра касцёлы гэтага адметнага рэгіёна Беларусі (>>).