|
CCCLXVI
О Дзева Найсвятая, у якой
Пераўвасобіліся рысы Бога!
Ты стала спадкаемніцай Ягонай
І як Царыца царства незямнога
У небе ззяеш сонечнай парчой,
Увенчаная зорнаю каронай.
Цябе я слаўлю гэтаю канцонай
І зноўку прад Табой
Схіляюся з мальбой,
Каб стала Ты яшчэ больш пранікнёнай.
Хоць ты Царыца неба, а я пыл,
Ты дапаможаш мне сваёю
Уладай незямною
Узняцца ў небасхіл.
О Дзева мудрая, што множыць лік
Жанчын разумных і высакародных,
Якімі грэшны род наш ганарыцца!
О шчыт, які ў варунках безвыходных
Дапамагае ад жыццёвых пік
І ўдараў злога лёсу мне адбіцца
І смерці злой дачасна не скарыцца!
Ты свежы ліставей
У полымі страсцей.
Пачуй мяне, Нябесная Царыца,
І сумнымі вачамі з вышыні,
Нібы наносяць Сыну каты
Крывавыя стыгматы,
На верніка зірні.
О Дзева Беззаганная, Дачка
І Маці родная Святога Сына!
Табой асветлена жыццё зямное,
Чым ганарыцца горняя краіна.
Ты веры паўнаводная рака,
Ты міласэрнае святло і тое
Цудоўнае акенца, праз якое
Прыйшоў той Дабрадзей,
Што ўратаваў людзей.
Прывабіла Тваё чало святое
Тварца- Айца, і Ты ператварыць
Змагла ў духоўны скорам
Прамаці нашай сорам
І мір нам падарыць.
О Дзева Міласэрная! Сабой
Ты ўвасабляеш вернасць і лагоднасць,
Ты дабрыні і чысціні Крыніца.
І неба, што з Табой адчула роднасць,
Цябе ўзяло, каб сеяла спакой
Ты ў нашы душы з неба, як Царыца.
Дачка, Нявеста, Маці спалучыцца
Ў адной Табе змаглі,
Каб рабства на зямлі
Ўжо не магло ніколі паўтарыцца.
Я спадзяюся на Цябе адну
І веру: боль мой несціханы
Хрыстовы сцішаць раны
І волі я глыну.
О Дзева непаўторная, якіх
Дагэтуль не было і больш не будзе!
За міласэрнасць, святасць і пяшчоту,
Што могуць спалучыцца толькі ў цудзе;
За цеплыню ласкавых рук Тваіх,
За ўзвышаныя думкі і за цноту
Табе прыносіць неба пашаноту.
Я ў смутку і ў журбе
Імкнуся да Цябе.
Ты праганяеш прэч маю самоту,
Калі заходжу я ў прасторны храм
Тваёй душы, спагадная Марыя.
Ад скрухі і хандры я
Вылечваюся там.
О Дзева светлая! Мой праваднік!
Ты палымнееш зоркай пуцяводнай,
Выконваючы ролю стырнавога.
У буру я плыву пустыняй воднай.
Яшчэ крыху і жудасны мой крык
Заглушыць стогны ветру штармавога.
Я на Цябе малюся, як на Бога.
Магчыма, я грашу,
Ды ўратаваць душу
Я не магу, мне трэба дапамога.
Цнатлівы манастыр душы Тваёй
Стварыў Усемагутны Божа.
Ён саўладаць паможа
Мне ўрэшце з сатаной.
О Дзева! Я маліўся і прасіў,
І слёзы ліў даволі часта марна,
Бо лёс мне рыхтаваў цяжкія страты.
З тых дзён, як нарадзіўся я ля Арна,
Нямала па зямлі я калясіў
І шмат у чым, вядома, вінаваты,
Аднак я не чакаў такой расплаты.
О Дзева, не марудзь
І больш спагаднай будзь,
Бо лук маіх гадоў ужо напяты
І, можа, гэты ці наступны год
І ёсць страла, якой працяты буду
Сярод грахоў і бруду
Я ўрэшце навылёт.
О Дзева, памажы мне сцішыць боль
Пякучых ран сардэчных, бессардэчна
Нанесеных жанчынаю зямною,
Якую я кахаў так недарэчна,
Бо ёю ператворана ў юдоль
Жыццё зямное, што пражыта мною.
Я прытаміўся ёю жыць адною.
Спадарыня нябёс!
Ты перайнач мой лёс
І ўцеш мяне прыемнай навіною.
Зірні спагадна і паабяцай
Стаць вернаю ахоўніцай маёю
І Боскай дабрынёю
Мой заглушыць адчай.
О Дзева вечная! У цяжкі час
Я спадзяюся на Тваю спагаду
І верую, што на апошнім кроку
Ты верніка не кінеш без нагляду,
Каб жар выратавальны ў ім не згас,
Каб у яго быў Бог навідавоку
І каб ён не скарыўся злому року.
Хоць з помаччу Медузы лёс
У камень, поўны слёз,
Што замінаюць Сонца бачыць зроку,
Мяне бязлітасна ператварыў,
Зрабі, о Дзева, каб мой плач апошні
Не грэшны, а набожны
І ачышчальны быў.
О Дзева з дабрачыннаю душой,
Пустой і беспадстаўнай пыхі вораг!
Прашу, прымі мой опус пакаянны.
Калі надзел зямлі мне быў так дораг,
Дык уяві, з пачцівасцю якой
Любіць магу я позірк беззаганны
Такой, як Ты, высакароднай Панны.
Калі сваю тугу
Я ўтаймаваць змагу
І заглушу свой боль бесперастанны,
Я прысвячу Табе свой кожны ўздых,
Свой стыль, свой талент і сваё натхненне,
І мо задавальненне
Адчуеш Ты ад іх.
Час надыходзіць класціся ў труну.
Прыгорблены грахамі,
З узнятымі рукамі,
О Дзева, я прашу Цябе адну.
Няхай з маёй душы Сын родны Твой
Цяжар грахоўны здыме,
У лік блажэнных прыме
І ёй падорыць вечны супакой.
23. 07. 2006
Пераклад Уладзіміра Скарынкіна
|
