«КВЕТАЧКІ» ПА БЕЛАРУСКУ:
ПАСЛЯСЛОЎЕ ПЕРАКЛАДЧЫКА

Часопіс «Наша вера» друкаваў пераклад «Кветачак» святога Францішка на беларускую мову ажно з 2007 года. Публікацыю вельмі прыхільна сустрэлі чытачы і каталіцкая грамадскасць, больш за тое, як мне казалі ў рэдакцыі, многія чытачы нават збіралі нумары часопіса, каб мець гэты твор цалкам. Цяжка паверыць, што праца скончаная і ўсе гісторыі з жыцця святога Францішка ўжо пабачылі свет, няхай і ў часопісным варыянце, і што замест словаў «працяг будзе» дастаткова па­ставіць кропку.

Перакладаючы, мы не толькі робім набыткам сваёй мовы творы сусветнай літаратуры і культуры, але і вучымся, прапускаем праз сябе тэксты, якія напаўняюць нас сваёю мудрасцю і багаццем, асабліва, калі гэтыя творы былі напісаныя амаль сем стагоддзяў назад.

Хочацца спадзявацца, што неўзабаве беларускія чытачы атрымаюць магчымасць мець «Кветачкі» святога Францішка асобным выданнем і што гэтая кніга парадуе і ўзбагаціць усіх нас.

У якасці невялікага працягу «Кветачак» я прапаную чытачам «Нашай веры» ў сваім перакла­дзе верш сучаснага італьянскага паэта Джанні Д’Элія, прысвечаны святому Францішку.

Аксана ДАНІЛЬЧЫК

Гл. таксама:
Джанні Д'ЭЛІЯ :: ПРОСТАЯ БЕЛАЯ СТАРОНКА ::