ДА ВЫШЫНЯЎ ПРЫГАЖОСЦІ

Да роднай бярозы прыпасці... 2 сакавіка адышоў у вечнасць народны паэт Беларусі Рыгор Барадулін, аўтар звыш 70 кніг паэзіі, а таксама шматлікіх зборнікаў паэтычных перакладаў. Развітальнае богаслужэнне прайшло 4 сакавіка ў мінскім Чырвоным касцёле святых Сымона і Алены (у 11.15 адбылася паніхіда ў грэка-каталіцкім абрадзе, а ў 12.00 — святая Імша ў рыма-каталіцкім абрадзе). На гэтае развітанне Апостальскі нунцый у Беларусі арцыбіскуп Клаўдыё Гуджэроцці скіраваў сваё слова ў памяць пра народнага паэта, якое было зачытана падчас святой Імшы.

...У той момант, калі Касцёл аддае апошнюю зямную пашану вялікаму паэту, давяраючы яго міласэрнай любові Бога, прагну і я маліцца разам з вамі.

Глыбокае і тонкае мастацтва Рыгора Барадуліна — гэта голас маўклівай душы беларускага народа. У ім паэзія і духоўнасць яднаюцца ў моцных абдымках. <...>

Мова — гэта інструмент, якім карыстаецца Бог, каб размаўляць з народам. Таму яна святая і вартая, каб яе шанавалі і любілі, як маці. На гэтым інструменце Рыгор Барадулін умеў выконваць дзівосныя мелодыі і дазволіў беларускаму народу сваёй мовай дакрануцца да вышыняў прыгажосці.

Барадулін хацеў таксама, каб шляхетныя паэты іншых культур маглі паўтарыць свае спевы на беларускай мове. Разам з іншымі таленавітымі аўтарамі ён спрычыніўся да перакладу «Рымскага трыпціха» Яна Паўла ІІ, якога крыху больш чым праз месяц Каталіцкі Касцёл абвесціць святым. <...>

Веру, што беларусы, якія разам з іншымі святымі жывуць у ззянні Божага святла, выйдуць яму насустрач, каб падвесці яго да Бога. І, быць можа,  Бог прывітае яго ў сваім доме простымі словамі, якімі беларускае сэрца вітае гасцей: «Калі ласка, Рыгор».

Дарагія беларусы, любіце вашых мастакоў — вялікіх і шматлікіх. Яны вучаць вас узнімаць свае вочы ўгору, да Бога надзеі, да жыватворнага сонца, якое ззяе ў вашым вечна прывабным небе, абу­джаючы ў вас сілы да штодзённага ўваскрасення.

Божа, благаславі Беларусь і яе народ з яго даверлівай мовай і пяшчотнымі спевамі.

Гл. таксама:
Ірына БАГДАНОВІЧ :: ПАЭТЫЧНАЕ АПОСТАЛЬСТВА РЫГОРА БАРАДУЛІНА ::