ЗАМЕСТ БЕЛЫХ ПІВОНЯЎ
НА СВЕЖУЮ МАГІЛУ
КСЯНДЗА ЯНА ШУТКЕВІЧА

О, Езу Хрыстэ, будзь пахвалёны! Першая споведзь хлопцаў, дзяўчатак. Па ўсім нашым краі цвітуць півоні — Лета пачатак. Можна не есці, толькі надыхацца паветрам родным… А ксёндз Ян Шуткевіч ў труне вярнуўся з Вільні ў Гародню. Паміж Гародняй, Менскам і Вільняй – высокі крыж надмагільны. Падпілавалі, як дуб грымотны. Над крыжам ясных зорак салют. Якія хлопцы былі ў Гародні, падчас маёй маладосці тут! На дзірванах Вялікага Княства, у рытмах бязбожнікаў і паганства меў таленты: мог быць музыка, разьбяр, ды Езус на службу сваю забраў. Споўніў ён Божае прадвызначэнне — святыняў і душ людскіх адраджэнне. Няўтульна ў савецкім Мінску маліцца, — з’ехаў у Вільню, таксама ў сталіцу… Мог бы спачыць на Росах, каб не матулін крыж гэты родны. Святога лета звон шматгалосы… Ксёндз Ян вярнуўся ў Гародню. Данута Бічэль. 7 чэрвеня 2017 г.

Гл. таксама:
Дыякан Мікола ГРАКАЎ :: СВЯТАР ЭПОХІ АДРАДЖЭННЯ ::
Крыстына ЛЯЛЬКО :: ІМГНЕННІ ЖЫЦЦЯ Ў ЗДЫМКАХ І ЎСПАМІНАХ ::
Аркадзь ШПУНТ :: ПАМЯЦІ КСЯНДЗА ЯНА ШУТКЕВІЧА ::